الموت حقيقة ..... موت أختي رحمها الله وأسألكم الفاتحة على روحها الطاهرة

أرثى هنا أختى الحبيبة رحمها الله ،
وأسألكم الفاتحة على روحها الطاهرة ،
والدعاء لها ولأموات المسلمين بالرحمة والمغفرة .
***

الـمـــوت حَـقـيـقـَة ...!
***


الموت حَـقيقـَة ...!
بَـس لـَمَّا الموت بـِيـيجى باتنـِفِـض ،
حِـتـِّـة القـِوَّة اللى فِـيَّـا تِـترِفِـض ،
والعين بـِتِـدمَـع وَحـدَها ،
بَـس الإيمان هـُوَّ اللى يـِفـضـَل فى الفـؤاد ،
والقـَلب يـِبكى عَ الوِداد ..:
فِـيـنِـك ياأخـتى ؟ تِـمسَـحى دَمعـى اللى فاض ؟!
بابكيكى إنـتى ياشـَقـيقِـة مُـهجـِتى ،
بَـعدِك حَ اعيش فِ الـدُّنـيا ، رافِـض دُنـيـِتى
ماانتى اللى كـُنـتى
حَـتـَّى فى الأحلام ، تِـوَنـِّس وِحـدِتى ...
تـَحت التـُّراب وَحـدِك حَ اسيـبـِك ، والوَداع ..؟!
بـِيـزَيـِّنوكى بـِالكـَفـَن ..؟!
يـِقـدَر جمالِـك يـِندَفـَن ؟!
والجـِسم دا بَـعد الحياة ؛
يـِرجَـع مَـصيرُه لِـلعَـفـَن ..؟!
مـؤمِـن أنا ...
بِـس الألـَم بـِيشـُقـِّنى ،
والـذكريات بـِتـشِـدِّنى؛
وافـتـَح دِراعِـى لـِلخـَيال ...
يـِمكِـن إيـديكى تضـُمـِّنى ...!
مـؤمِـن أنا ...
بَـس الجـِراح بَـعـدِك مايـِنفـَع تِـنحَـسَـب ،
أو أى مَـعنـَى لِـلألـَم لـَو يـِنكـَتـَب ؛
يـِوصـِف ألـَم ...
بـُعـدِك ألـَم ، صـَدِّك ألـَم ؛
أكبَـر معـانى لِـلألـَم ،
ساعِـة ماشـُفـيِـك والحياة
خارِج مَعـالِـم دُنـيـِتـِك ،
والروح بـِتِـصعـَد لِـ إلاه ،
كانِـت مَـعاكى وفارقِـتـِك ...!
أختى الحَـبـيـبَة :
لـَو قـالولِـك : مـين إلاهِـك ؟ .. إثـبَـتى ...
قـولى الإلاه واحِـد أحَـد ، رَبِّ الوجـود ..؛
قـولِـى النـَّـبى هُـوَّ الحَـبـيب المُـصطـَفـَى ،
هُـوَّ الشـَّـفيع ،
قولى الكِـتاب قـُرآن كـَريم ، آمِـنت بـِـيه ؛
قـولى ان دِيـنِـك مُـسلِـمَة
ومسَـلـِّمَـة لِـلموت وإنـِّك راضـيَـة بـِيه ،
قولى ان نِـفسِـك تِـسـكـُنى جَـنـِّـة رِضا ؛
يـِمكِـن لإنـِّك مؤمِنـَة ومـوَحـِّدَة ،
قولى اللى أجمَـل مِـن كِـدَه ...
قولى ان قادِر رَبـِّـنا يـِمحِـى الـذنوب ،
رَبـِّك كـَريم ؛ قادر يـِنـَوَّر سِـكـِّتِـك ،
وتشـوفى جَـنـَّـة وتِـسـكـُنى جَـنب الرَّسول ..؛
أمـَّا أنا ..
حَ افضـَل حياتى أذكـُرِك
وادعِـى اللى شـابـِـه دَمـِّنا ،
يـِغـفِـر ذِنوبـِك كـُلـَّها ؛
ويـثـَبـِّـتِـك عـَند السـؤال ،
ويلـَبـِّـسِـك توب الجَـلال ،
يـِجـمَـعنى بـِيكى ف جَـنـِّتـُه ،
يوم اللـُّقا .......
***
**
*
اللهم تغمدها وسائر أموات المسلمين برحمتك ،
وأسكنها فسيح جنتك ، واجعل قبرها روضة من رياض الجنة يارب العالمين ،
اللهم آمين ..
الفاتحة على روحها الطاهرة .

بِسْمِ اللَّهِ الرَّحْمَنِ الرَّحِيمِ
الْحَمْدُ لِلَّهِ رَبِّ الْعَالَمِينَ
الرَّحْمَنِ الرَّحِيمِ
مَالِكِ يَوْمِ الدِّينِ
إِيَّاكَ نَعْبُدُ وَإِيَّاكَ نَسْتَعِينُ
اهدِنَا الصِّرَاطَ الْمُسْتَقِيمَ
صِرَاطَ الَّذِينَ أَنْعَمْتَ عَلَيْهِمْ غَيْرِ الْمَغْضُوبِ عَلَيْهِمْ وَلاَ الضَّالِّينَ .
آمــــــــــين .
*